捲芒好睇又好玩！Moto RIZR、Lenovo ThinkBook X1 Fold 體驗報告
Moto RIZR
Lenovo ThinkBook X1 Fold
Lenovo ThinkPhone by Motorola
更多其他展示的產品
話說 Lenovo 就喺香港舉行咗個記者會，業績公佈就唔係重點，我又唔係財記，但佢哋又有請我哋去，點解呢？原來喺記者會門外，就擺咗一堆香港之前未展示過嘅產品，其中有兩款產品，令我覺得好特別，好想同大家分享一下！一部電腦，一部手機，兩款都係用上捲動屏幕 (下稱捲芒) 嘅技術，分別係 ThinkBook X1 Fold 同埋 Moto RIZR，第一次上手，無乜嘢可以試，就畀大家睇下外觀，同埋帶大家體驗一下！Let's Go！Moto RIZR 係 Lenovo 喺今年 MWC 大會上，展示嘅一部捲軸屏手機，定位同之前嘅 Moto RAZR 有啲似，都係主打輕巧已攜，平時唔需要用嘅時候，就只有一塊 15:9 嘅 5 吋 POLED 京東方屏幕，當你想喺一個較長嘅屏幕去使用時，只要雙 click 右側嘅電源按鍵，屏幕就會拉長至 22:9 嘅 6.5 吋芒。而收埋屏幕嘅時候，多餘嘅部分會去咗機背，可以用嚟自拍時用，或者去睇時間。另外，當你播放 YouTube 嘅時候，只要轉動成橫屏，屏幕亦都會自動拉長。整體嚟講，呢部 Moto RIZR 幾特別，期待香港會引入，到時再有機會詳細試玩！▲ 未展開時係一個 5 吋屏幕。▲ 多餘嘅屏幕係捲咗去機背位置。▲ 捲到去機背，可以當成副屏幕咁用，不過實用功能目前嚟睇就似乎唔多，主要都係自拍時睇到自己，同埋可以睇時間用。▲ 有兩個後置鏡頭。▲ 仲有 Motorola 嘅標誌。▲ 捲到後面嘅屏幕，可以用嚟自拍。▲ 呢條影片可以畀大家更清楚睇到，點樣令屏幕拉長，以及捲軸屏出嚟嘅效果係點樣。Lenovo ThinkBook X1 Fold 同樣都係用上捲軸屏設計，可以將電腦屏幕拉長觀看，正常屏幕尺寸係 12.7 吋，比例為 4:3，解像度則有 2024 x 1604，但當透過右側嘅按鍵，將屏幕拉長之後，就會變成 15.3 吋 8:9 比例嘅屏幕，解像度為 2024 x 2368。具體硬件規格就唔詳細講，呢部機重點都係個芒，睇相啦！▲ Lenovo ThinkBook X1 Fold 機身外觀。▲ 未拉長時部電腦係咁嘅樣。▲ 有一個唔算十分大嘅 Pad。▲ 左側有兩個 Type C 插槽。▲ 右側同樣有兩個 Type C 插槽以及 3.5mm 耳機孔。▲ 右側上方有電源鍵以及屏幕延伸 / 收埋嘅開關鍵。▲ 重量大約 1.4kg 左右，大概跟 13.3 吋的 M1 MacBook Pro 一樣重。▲ 給大家看看屏幕伸長時係點。▲ Lenovo ThinkPhone by Motorola。▲ 具有 6.6 吋 FHD+ pOLED 芒。▲ 穿窿芒設計。▲ 機背設計係咁，具備 IP68 防水防塵。▲ 具有三個主鏡頭。▲ 機背右下方會見到寫住 ThinkPhone by motorola。▲ 側邊睇間條紋理，靚唔靚？▲ 左側有個紅色快捷按鍵，可以自訂快捷功能。▲ 右側有電源鍵以及音量鍵。▲ 底部有 Type C 插槽以及 SIM 卡槽。▲ 其他 Lenovo 新品：ThinkPad X1 Fold 16 Gen 1、ThinkPad X1 Yoga Gen 8、 ThinkPad T14s Gen 4。▲ 仲有 Lenovo Yoga Pro 7i、Yoga Book 9i。▲ Lenovo ThinkReality A3，即係 AR/VR 眼鏡， 蘋果好快會推出嗰款呢 ！不過放咗入透明箱內，無得戴嚟試下。
Source: ePrice.HK
