〔懶人包〕iOS 17 仍然係重點！即數 iPhone 15 系列 10 個必知新功能 / 升級
即數 iOS 17 10 大更新賣點
又到一年一度 Apple WWDC 大會，年年重點都係 iOS、iPadOS 等軟件更新，今年話出 XR 裝置喎，重點方向會唔會變咗？Sorry，睇到發佈會講 XR 頭戴嗰陣 Apple 股價插水，就知佢唔會係重點，我都係講返軟件嘢算，呢篇文章先講 iOS 17。Apple 形容 iOS 17 係一個好重大嘅軟件更新，其中都有啲新功能，係吸引到我！即刻整理一下，到底 iOS 17 有乜賣點！Let's Go！001：可以透過不同字體、Memoji 等，嚟自訂電話 App 通話時嘅畫面，並可以為唔同嘅聯絡人，去自訂唔同嘅外觀。002：可以使用 Livemail 新功能，有人喺留言信箱度留言嘅時候，可以將佢轉錄成文字，等你可以了解通話內容，根據情況決定係咪要聽電話。而當你係透過 FaceTime 同某個人通話嘅時候，如果對方唔接聽，你就可以用影片嘅方式，留言畀對方。003：iMessage 方面，用家可以喺對話中快速創建以及插入動態貼圖，更可以喺其他支持 Markup 嘅地方，用到呢啲貼圖。另外，iMessage 仲有右拉快速回復訊息、位置共享嘅功能，其實講到好似好新咁，咪即係 WhatsApp 咁囉，不過佢就改良咗，可以跳轉到你已閱讀嘅最後一個訊息，並且有更加精準嘅篩選器等等。004：Apple 加入一個全新嘅交換號碼快捷方式，叫做 NameDrop，例如 A 君同 B 君啱啱相識，想交換電話號碼，你只要將兩部 iPhone 擺埋一齊，就可以快速共享聯絡方式。講到尾，其實係 AirDrop 嘅一個延伸功能。005：以往 AirDrop 一定要一直兩個裝置好近距離，先可以傳輸到相片、影片等檔案，但如果中途行開咗，就會中斷，而家 iOS 17 會依賴網絡嚟傳輸，避免中斷傳輸嘅情況，咁樣就算唔係一直保持喺附近，都無所謂，不過講開又講，AirDrop 本身都好快，等一等有幾難先～006：iOS 17 鍵盤可以預測你輸入中嘅句子，等你可以自動輸入，而且多得 Apple Silicon 技術，可以根據你輸入嘅模式，更好咁學習。007：推出全新 Journal 應用程式，幫你回憶一啲重要時刻，你去過乜嘢地方，影咗乜嘢相，聽咗乜嘢歌或者 Podcast，同埋聯絡咗邊位朋友親人，都可以加入到呢個 Journal App 入面，將各種類型嘅資料總合喺一個地方，只要輸入一個特定日子，或者加入一啲描述，iOS 就會幫你顯示返呢啲資料出嚟，等你可以回憶一下一啲生活上嘅點滴。008：加入 Standby 模式，等你部手機可以橫向充電嗰陣，以 Always On 嘅方式，顯示時間、日期、天氣等信息，你仲可以喺唔同嘅小工具之間滑動，查看你可能感興趣嘅各種類型資料。當你訓覺嘅時候，Standby 亦會切換為較暗、紅色嘅風格，避免太過光亮。009：以前要 Hey Siri 或者「喂 Siri」去叫 Siri 出嚟，而家唔需要喇，就咁叫 Siri，再提出你嘅指令就得。但近期咁流行 ChatGPT 呢類嘅 AI，暫時睇未知會唔會令 Siri 更加智能化。010：Google Maps 幾年前已經有得下載離線地圖，而家 Apple 地圖都做到，等你唔使數據都可以睇地。
Source: ePrice.HK
