Apple 怕你睇壞眼！立即評測 iOS 17 全新勁煩但又實用嘅警告字眼
如何啟動「螢幕距離」功能？
版主評測！呢個功能係咪實用？
呢排成日喺度玩 iOS 17 嘅新功能， 早前就分享過一個我好中意嘅功能，叫做 Standby Mode ，當叉住電嘅時候，打橫放，就可以喚出，可以用嚟睇時間，又或者加入一啲小工具，但你可以透過 Standby Mode 睇備忘錄、日曆、甚至股市等等。今次我想分享嘅一個功能，我會評佢係一個喺「某些情況」下幾實用嘅功能，可以幫你保護眼睛！想知詳情，睇下文啦！今次想分享嘅 iOS 17 功能，係一個叫做螢幕距離嘅功能，睇到個名，唔好以為係佢同你量度你眼睛同屏幕之間嘅距離，而係佢會再做多步，如果佢監測到眼睛同屏幕之間嘅距離少過 30cm，並維持咗一段時間，佢就會彈出通知同你講：「iPhone 距離太近」，並提醒你要「與 iPhone 保持一支手臂的距離」，咁樣先可以保護到你嘅視力。出現呢個通知之後，你會見到下方有個「繼續」嘅按鍵，但顯示為灰色，唔畀你撳入去，直至你嘅距離達到要求，先至可以變成藍色，等你可以撳「繼續」，繼續使用你嘅手機。1. 打開「設定」。2. 打開「螢幕使用時間」。3. 進入「螢幕距離」。4. 打開「螢幕距離」功能。到底呢個功能係唔係實用呢？我會覺得，實用係一定的，不過睇咩情況。我有個小朋友，去到差不多 3 歲，平時非常活躍，好多時帶住佢出去食飯，都需要一個「電子奶嘴」，只要畀部 iPad 佢，播 YouTube，佢就可以乖乖坐喺度。問題係，好多時唔好講小朋友，就算係大人，都會睇睇下愈來愈前，雙眼同屏幕嘅距離愈來愈近，咁樣唔單止會加劇眼睛嘅疲勞，而且小朋友長時間係咁嘅話，仲會好容易引致近視。而呢個功能喺呢個情況下，就大派用場，當佢太近對住個芒一段時間，就會彈通知唔畀佢睇到，一定要佢坐返後啲，至少 30cm 距離，咁先可以繼續睇。然而，如果我自己用，有時都會覺得麻煩，尤其是我都會用手機追劇，成日去到刺激位又彈出嚟，叫我遠啲，但有時我訓喺床度睇片，好難遠，所以我呢種情況下，會寧願將呢個功能熄咗佢。但畀小朋友用嘅話，我就會覺得呢個係一個唔錯嘅功能。你又點睇呢？
Source: ePrice.HK
