Moto G73 開箱評測！二千中價位 設計平實 + S778G 級數性能！三星、小米以外另類好選擇？
Moto G73 外觀 + 開箱
Moto G73 性能跑分
Moto G73 續航能力
Moto G73 相機實拍
廣角 超廣角
小結
成日都覺得，香港而家無乜手機選擇，二千零蚊價位，數來數去，唔係三星某幾款 Galaxy A 系列手機，就係小米，再唔係就 Nokia。不過，最近我就上手試玩過一部出自 Motorola 嘅 Moto G73，香港賣價都係二千中，以呢個價位手機嚟講，呢部都可以係三星、小米以外嘅一個好選擇。呢篇文章入面，我就會同大家分享一下，呢部 Moto G73 嘅評測，睇下你又有無興趣！首先由設計開始講起，Moto G73 採用咗流線型嘅外觀，整體拎上手嘅手感相當唔錯，但如果從外觀上嚟睇，G73 其中一個缺點，就係底部嘅下巴比較大，呢一點令到成部手機美中不足。另外，Moto G73 用上啞光質感嘅後蓋，有人覺得會影響佢嘅高級感覺，但我又覺得，磨砂唔易沾指膜，更加實際有用。雖然喺設計上，Moto G73 並唔可以稱得上係完美，多少總會有啲缺陷，但一部手機基本嘅元素，基本上佢都有，包括有 3.5mm 耳機孔，同埋用上 USB-C 充電等等。但都有一個地方要注意嘅，係官方並無公佈 G73 嘅防水防塵等級，但就聲稱喺一定程度之下，具有防濺水嘅功能。屏幕部分，Moto G73 用上 6.5 吋嘅 LCD 屏幕，解像度為 2400 x 1080，支持 120Hz 嘅高刷新率，雖然不像一般高階手機用上 OLED 技術，但佢依然可以提供到唔錯嘅視覺體驗，色彩表現相當好，而且亮度同對比度都相當足夠，即使喺陽光底下使用，都無乜大問題，而喺日常使用入面，可以提供到清晰嘅影像同埋文字，視覺體驗相當舒服。以下係 Moto G73 嘅開箱：▲ Moto G73 包裝盒。▲ 內置 8GB RAM + 256GB ROM，顏色為藍色。▲ 包裝盒背面會有手機的外觀圖以及一些手機賣點，例如支持 Dolby Atmos 音效以及 120Hz 屏幕刷新率，並支持 5G 以及 5000 萬像素的相機。▲ 一打開包裝盒，見到透明保護套已經套了在手機上了。▲ 內有充電火牛、Type C 線，還有好耐無見手機有送嘅耳機。▲ 充電火牛支持 30W 輸出。▲ Moto G73 待機時會顯示像上圖這樣圓形的時間資訊。▲ 頂部有穿窿芒設計。▲ 下巴比較粗。▲ 機背係啞光好似磨砂咁嘅材質。▲ 相機寫住 50MP，有兩個後置鏡頭。▲ 右側有音量鍵以及電源鍵。▲ 左側則有 SIM 卡插槽。▲ 機底有 Type C 充電插槽、3.5mm 耳機孔以及喇叭。▲ 頂部會寫住 Dolby Atmos。性能方面，Moto G73 配備了 MTK 天璣 930 處理器，適合處理一些要求較低嘅任務，在處理日常活動時，手機可以保持順暢，並唔會有明顯窒機或者延遲。不過，當處理要求較高嘅任務時，例如玩一些比較複雜嘅遊戲，手機就可能會有發熱同埋掉幀嘅情況，但對於普通一般使用嚟講，G73 嘅性能表現相當穩定可靠。至於具體效能表現，版主會用安兔兔評測 App，同大家測試一下 CPU 以及 GPU 的性能，並且會用 AndroBench 5，來測試一下 ROM 的讀寫速度如何。根據安兔兔評測跑分結果顯示，Moto G73 總分有 480225 分，當中的 CPU 成績為 153062 分，而 GPU 成績則為 96023 分，從成績上看來，MTK 天璣 930 處理器大約是 Qualcomm Snapdragon 778G 處理器相若的分數，但在 CPU 和 GPU 的成績略遜一籌，不過實際使用不會有太大差距。至於用來測試 ROM 讀寫速度的 AndroBench 5，Moto G73 的連續讀取以及連續寫入速度分別為 968.97 MB/s 以及 807.98 MB/s，這個速度代表 Moto G73 是用上 UFS 2.2。喺續航能力部份，Moto G73 內置咗大部分手機都有用嘅 5000mAh 電池，喺實際使用之下，就算唔需要頻繁叉電，基本上都可以輕鬆撐到一日，但同其他 5000mAh 電池嘅手機相比，G73 嘅電池續航時間就稍為短咗少少。使用 Moto G73 觀看 Netflix 影片一個鐘之後，手機電量下跌咗 17%，其實可以見到算係比較食電，跟同樣有 5000mAh 大電嘅中階手機 小米 POCO X5 5G 相比，POCO X5 5G 只係用咗 6% 電，可見 G73 並唔算特別慳電；而玩輕度遊戲半小時下，Moto G73 則用咗 11% 嘅電量。充電速度方面，Moto G73 支持 30W 快速充電，以呢個價位嘅手機嚟講算係可以接受，但唔會係領先行業嘅水平。在實際測試之中，Moto G73 用咗 27 分鐘，就可以將手機由 0% 充電至 50%，而如果要將手機叉滿電，就需要 1 小時 20 分鐘，呢個充電速度算係可以接受。相機部分，Moto G73 配備咗一個 5000 萬像素嘅廣角相機，可以捕捉到色彩豐富同埋鮮明嘅影像，光圈值為 F1.8，理論上可以有助夜拍嘅時候，讓更多的光線進入，並且可以拍出曝光均衡的相片，並且具有人像模式、夜景模式的功能。而 G73 仲有一個 800 萬像素嘅超廣角鏡頭，不過同主鏡頭相比，影像質素較低，當放大嘅時候會有明顯嘅變形，同埋會有清晰度不足嘅情況。手機都會支持數碼變焦同埋微距拍攝模式，但效果就唔係特別出眾。另外，Moto G73 具有一個 1600 萬像素嘅自拍相機，光圈值為 F2.4，可以拍攝到細節充足以及色彩準確嘅自拍照，不過喺強烈光線之下，影像質素可能會受到影響。至於影片攝錄方面，後置相機可以 1080p 60fps 的解像度進行錄製，雖然同現時大多數智能手機嘅 4K 拍攝相差甚遠，但以二千幾蚊價位嚟講，則算係比較合理。而前置鏡頭則可以 1080p 30fps 錄製影片。不過，由於缺乏 OIS 光學防震，如果用 Moto G73 嚟拍片，會比較抖動得勁，所以如果你用嚟拍 Vlog，一邊行一邊錄，呢部 G73 就唔會係一個好嘅選擇。以下為幾張用 Moto G73 影嘅相片，畀大家參考一下：在實際使用上，雖然 Moto G73 的相機並不是十分出色，而且只有廣角同埋超廣角兩個鏡頭，無主流手機擁有嘅光學變焦鏡頭，而且超廣角鏡頭影出嚟清晰度又唔係特別出色，但整體設計其實唔算差，除咗下巴位置闊咗少少，然後再睇埋手機嘅價錢，二千中價位有接近 Qualcomm S778G 處理器嘅性能，支持 5G 網絡，外觀又唔差，可以話係三星、小米、Nokia 以外，另類嘅一個唔錯選擇。唔知大家又對呢部 Moto G73 有無興趣呢？Moto G73 在文章發表時，大舖賣價為 $2699， 按這裡有詳細規格及最新賣價
Source: ePrice.HK
