傳 Apple Card 改與 AE 合作！香港會用到嗎？
傳高盛唔玩
相信唔少香港人都有 Apple Pay，但作為果粉，可能更加想美國嘅 Apple Card 可以喺香港都申請得到，尤其早前講 Apple Card 加入咗類似「定期儲款」息口仲要好鬼高 ；又有「Buy Now Pay Later」分期付款嘅功能，想買嘢，好過揾財務公司借錢。有無機會香港都會有得用 Apple Card 呢？！呢個消息，可能令大家有啲想像，至少感覺 Apple Card 呢件事，衝出美國係有可能。根據《華爾街日報》嘅報導，Apple Card 嘅合作銀行高盛，想終止同蘋果嘅合約。高盛而家喺同另一個金融機構談判緊。今次傳出高盛唔玩，相信同佢哋嘅公司策略有關。聽到高盛呢個名，大家都只會聯想到經濟分析報導或者係股票、證劵賣點，Apple Card 係呢間公司少數面對普羅大眾嘅理財業務。事實上，市場早前已傳出高盛想減少呢部份嘅業務，令佢哋有更好嘅盈利能力。今次傳出高盛有機會唔玩，唔代表 Apple Card 會壽終正寢，消息指出，高盛其實想把 Apple Card 業務由美國運通接手。美國運通即係 AE。美國運通係美國，甚至全世界，都有廣泛零售銀行業務，唔少香港人都有一張 AE 卡吧。事實上，申請 AE 都唔係一件難事。所以，傳出 Apple Card 轉跟美國運通合作，其實令 Apple Card 更易打出美國以外嘅市場。不過，由於 Apple Card 都有利用 MasterCard 信用卡網絡，若轉成 AE，就要用上 AE 卡嘅網絡，流通性始終不及 MasterCard。另一方面，要家陣用開 Apple Card 嘅用家轉卡又係一件幾麻煩嘅事。《華爾街日報》仲話，高盛同美國運通嘅交易並唔係「馬上或者肯定」會發生。同時，蘋果都要同意新嘅合作夥伴關係。報導話，蘋果知道呢次嘅討論。到底 Apple Card 發行商會轉到 AE，若轉咗做 AE 為合作單位，又會否在美國以外，也會推出市場？暫時都係未知之數。內源： The Verge
Source: ePrice.HK
