疑用長者八達通入閘斷正 短髮女大鬧長沙灣港鐵站 兇職員摸胸非禮 喪嗌：「我拍返咪得囉！」｜Juicy叮
為打擊違規使用2元乘車優惠計劃，港鐵最近加強查票，並將違規罰款提高1倍至1000元，網絡近日瘋傳一段港鐵職員查票時，遇衝烈衝突的影片，一名短髮女疑使用長者八達通入閘斷正，在多名職員包圍下發惡，不但兇職員摸胸非禮，更勁高Key喪鬧。
查票激烈衝突 短髮女大鬧長沙灣港鐵站｜全程逐格睇↓↓↓↓
影片在網上瘋傳後引發熱議，其後有網民發現，有關影片並非近日發生，事件為2019年12月發生，最近在網上再翻熱廣傳，成為熱話。
全長逾5分鐘的影片開頭，見到約有五、六名港鐵包圍一名短髮女子，其中一名穿著「附例特勤隊」的港鐵職員，捉著該短髮女子的手。
該女子激動地向職員尖叫：「你依家唔畀我拍呀嘛！」一名港鐵職員即回應：「小姐你冷靜啲，你依家違反港鐵附例。」
短髮女：係你啲閘機有問題
短髮女子即大聲反駁：「我無違反附例，畀我拍多次，依家係你啲機有問題啫嘛，係咪呀！」
該女子繼續以勁高Key向職員咆哮，對於被包圍攔截非常不滿，一名港鐵職員即解釋：「頭先你走呀嘛。」
「我依家想拍多次啫喎！」
由於該女子的八達通卡被職員查票時取走，該女子在片中一再要求取回，她怒斥：「我依家想拍多次啫喎！」
一名穿著「附例特勤隊」的港鐵職員這時厲聲表示：「小姐，你拍咗飛囉喎，拍咩多次呀。」
該女子這時轉指港鐵閘機損壞：「我唔知點解你閘機咁......」該職員再厲聲表示：「你頭先唔係拍呢張飛呀。」
這時短髮女一時語塞，一時不知如何回應，說話結結巴巴起來：「點樣話我唔係拍呢張卡呀。」
「你無權沒收我嘅個人財物！」
當職員欲進一步解釋時，該短髮女子突轉向另一名職員，怒斥他捉著她的手，又要求取回水樽。有職員其後將放在地上的水樽，拾回交還女子。
其後短髮女子繼續尖聲喪鬧職員：「你係咪香港人嚟呀，講嘢！」「你哋有無權沒收我張卡先！」「你無權沒收我嘅個人財物！」「你畀返張卡我先！」「我畀你查，唔代表可以畀你沒收！」
期間，她更大罵一名阻止其衝前的男職員摸其胸部，但當另一名職員表示：「我依家幫你叫警察」，該女子又改口：「唔需要叫警察，係你哋嘅職員有問題呀。」
「依家係好易解決 我拍返咪得囉」
該女子不斷嗌破喉嚨地怒斥：「我無叫你賠，點解要報警？依家係你嘅職員『無程程』沒收我嘅嘢，係你嘅職員『無程程』摸我胸部，依家係阻住我個人時間，係唔係呀？依家係好易解決，我拍返咪得囉。」
該女子這時又激動走向圍觀市民，手指指怒斥職員，並向市民大叫：「如果你哋港鐵係需要人哋裝修嘅，唔該你哋同我拍片......」「放上連登！放上連登！」
港鐵職員期間不斷叫該女子冷靜，又向市民解釋：「我哋要求佢查飛，佢依家出示唔到張有效嘅車飛。」
突衝向扶手電梯走落月台
該女子繼續不斷尖聲怒罵職員時，又拿出學生證，指自己是學生，該張被沒收八達通是學生八達通。
但職員即時指正：「呢張係成人八達通嚟㗎，小姐。」職員又再解釋，有學生證亦需要申請學生八達通才能使用，「你有無申請學生八達通？」
女子沒有回答，只重覆嗌：「畀返張卡我啦！」這時突衝向扶手電梯，走落月台，多名職員即時尾隨阻止，影片至此結束。
根據上載影片的網民指出，影片在2019年12月4日晚上約8時發生，地點在長沙灣港鐵站，上載者未有交代後續情況。
網民：癲成咁好樣衰
影片引發網民熱議，不少網民批評女子「惡人先告狀」，聲大夾硬似「身有屎」：「個膽一啲都唔細，似惡慣同講歪理講得好流暢，駁慣嘴既人。」
「你都身有糞？如覺得自己無用長者八達通！即時自己報警，交畀法庭處理？如自己貪心使用就認錯交罰款了事。」
「呢位小姐，身有屎，畀人捉到正，發爛渣。」「她還不清楚如此呱呱叫，會驚動更多人，讓她自己更加丟臉！」「大聲當自己啱。」「好心斷正就低低地認左佢啦，癲成咁好樣衰囉。
6.25起上調附加費款額
逃票及違規使用車費優惠不但違反港鐵附例，亦對依法支付車資的乘客造成不公。為了加強打擊相關行為，港鐵由今年(2023年)6月25日起上調附加費款額，重鐵網絡附加費將由現時港幣500元增加至1,000元。
輕鐵及港鐵巴士的附加費則由港幣290元上調至港幣370元。同時，港鐵會加強查票及宣傳教育工作。
同場加映：大媽港鐵「跳閘」糾纏休班警 超騎呢原因搭霸王車嚇窒網民↓↓↓↓
網絡熱傳一段大媽在港鐵「跳閘」與休班警員糾纏的影片，大媽不斷掙扎，又口出狂言，期間更爆出超騎呢原因解釋搭霸王車，惹來網民熱議。
大媽港鐵「跳閘」糾纏休班警 全程逐格睇（足本字幕版）↓↓↓↓
詳情瀏覽：大媽港鐵「跳閘」糾纏休班警 超騎呢原因搭霸王車嚇窒網民
----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
Source: 星島頭條
