Honor Pad X9 發表，香港會賣？一文即睇平板賣點 + 比較 Pad X8 LTE 升級
Honor Pad X9 外觀 + 屏幕
Honor Pad X9 處理器性能
Honor Pad X9 相機 + 喇叭
Honor Pad X9 賣價
對比舊代 Honor Pad X8 的不同之處
001：屏幕尺寸和解像度
002：處理器和 RAM / ROM
003：相機
004：喇叭
005：電池容量
習慣用開華為手機，但覺得無 Google 唔方便，相信有唔少人都考慮轉會 Honor。佢哋唔單止淨係賣手機，而且仲有賣平板，之前就一直有賣 Honor Pad X8，最近留意到佢哋喺巴黎發表咗一部新一代嘅平板電腦 Pad X9，暫時未知香港會唔會賣，但舊代有賣，今代可能都有機會，到底有乜賣點，又賣幾錢呢？對比起 Pad X8 又有乜嘢升級呢？睇下文啦！Honor Pad X9 採用咗 11.5 吋 Honor FullView 屏幕，解像度為 2000 x 1200 (16:10 比例)，屏佔比為 86%，提高更佳嘅觀看體驗，並支持 274 PPI 像素密度。另外，Pad X9 唔單止具有自動亮度調節等智能功能，而且外觀靚靚仔仔，機背嘅雙鏡雙環設計，畀人一種好時尚嘅感覺。根據 Honor 所講，Pad X9 配有超薄邊框，而且厚度僅有 6.9mm，重量僅有 495g，唔單止令平板相當輕巧易於攜帶，而且仲可以為用戶提供無縫觀看體驗。Pad X9 配備咗 Qualcomm Snapdragon 685 處理器，內置 4GB RAM 以及最高 128GB ROM，支持最高 512GB microSD 擴充。所用嘅處理器屬於中階級數，所以性能上唔會好似旗艦處理器咁勁，但係作為一部平板電腦，常都更注重顯示同埋電池壽命多啲，而唔係性能。而 Pad X9 有 7250mAh 電池，可以提供長達 12 小時嘅影片播放以及長達 10 小時嘅網頁瀏覽，更支持快速充電。相機部分，Honor Pad X9 配備咗 500 萬像素後置鏡頭以及 500 萬像素前置鏡頭，後置鏡頭可以 30fps 拍攝 1080p 影片，而前置鏡頭則可以 30fps 拍攝 720p 影片，相機質素雖然比唔上一部智能手機，但已算係唔錯。另外，Honor 仲有六個喇叭，前面四個，後面兩個，可以覆蓋多個方向，提供更高嘅音量，以及更豐富嘅低音，並可以達至全方位立體聲嘅效果。而喇叭亦支持 Honor Histen，提供生動嘅 360 度聲音，進一步豐富聆聽嘅體驗。價錢方面，Honor Pad X9 有太空灰色，7 月 10 日起在英國上市，賣價為 179.99 英磅，計返港紙大約為 $1809，並會喺 7 月 19 日起於 Amazon 等商店有售。Honor Pad X9 用上了 11.5 吋 IPS 屏幕，解像度為 2000 x 1200，而 Pad X8 LTE 則配備 10.1 吋窄邊框屏幕，解像度為 1920 x 1080。Honor Pad X9 配備 Qualacomm Snapdragon 685 八核心處理器，內置 4GB RAM 以及 128GB ROM，而 Honor Pad X8 LTE 則配備 MTK Helio P22T 處理器，內置 4GB RAM 以及 64GB ROM。Honor Pad X9 前後置鏡頭均為 500 萬像素，而 Pad X8 LTE 的後置鏡頭和前置鏡頭則分別為 500 萬像素以及 200 萬像素。Honor Pad X9 配備了六個立體聲喇叭，而 Pad X8 LTE 則叭有雙喇叭設計。Honor Pad X9 電池容量為 7250mAh，而 Pad X8 LTE 電池容量則為 5100mAh。
Source: ePrice.HK
