Nothing Phone (2) 開箱評測！外觀設計靚仔 機背 LED 燈依然好型
Nothing Phone (2) 開箱看外觀
其他規格
價錢資訊
我記得上年，即係 2022 年，我上手玩過覺得相當型格嘅手機，就係 Nothing Phone (1)，特色就係會跟住音樂發光嘅機背，好鬼正！提到 Nothing 呢個品牌，佢係由 OnePlus 聯合創辦人 Carl Pei 建立嘅初創公司，Nothing Phone (1) 應該係佢哋當時用嚟試水溫嘅一部手機，而可能發現推出之後大受歡迎，而家佢哋又推出第二代嘅 Nothing Phone (2)，到底第二代同第一代，又有乜嘢升級呢？外觀上又同上年有乜唔同？呢篇文章先做個開箱評測，畀大家睇下呢部手機咩樣。同上年嘅 Nothing Phone (1) 一樣，Nothing Phone (2) 包裝盒都係用上好薄身嘅設計，包裝盒咁薄，意味住唔會有火牛，但用得 Android 手機嘅，相信屋企唔會缺火牛或者 Type C 線，所以有無火牛，對我嚟講其實無乜大分別。而今次 Nothing Phone (2) 有一點都係同上代一樣，你要拎入面部手機出嚟，就需要撕爛個盒。唔同嘅地方係，今次撕爛面頭個盒之後，入面仲有多一個白色盒，方便收藏。▲ Nohting Phone (2) 包裝盒，一如既往一樣咁薄，好輕鬆可以單手拎在手中。▲ 同上代一樣，都係一個紅色箭咀，畀你將包裝盒撕爛，變相「開咗箱」，就唔可以將佢恢復。▲ 包裝盒背面會見到少少基本資料，例如我手上呢部係灰色，而且內置 12GB RAM 以及 512GB ROM。▲ 同上代唔同嘅係，今年拆爛包裝盒之後，入面另外仲有一個白色嘅盒，方便收起來。▲ 打開會見到 Nothing Phone (2) 實機、USB Type C 線同埋一枝特別設計嘅 SIM 卡針。▲ 手機用上 Nothing OS 2.0，界面同一般 Android 手機風格好唔同。▲ 正面頂部會有穿㝫芒設計嘅前置鏡頭。▲ 底部係咁嘅樣。▲ 機背整體設計同上代差唔多，不過機背玻璃圓角幅度較大，LED 區域由上代 12 個增加至 33 個。▲ 具有 5000 萬像素廣角 + 5000 萬像素超廣角雙鏡頭。▲ 這種像是透明的機背，到今日看來我都覺得好有時尚感。▲ 右側係電源按鍵。▲ 左側則是音量鍵。▲ 機底有 SIM 卡槽、Type C 插槽同埋喇叭。▲ 機背發光時係咁嘅樣。▲ 設定入面有個 GLYPH 介面，用來控制機背嘅燈條。▲ 機背的燈更可以針對唔同嘅功能，有唔同嘅顯示方式。▲ 不過底部佢都有提醒，對於患有癲癇症和其他對光線敏感疾病的人士，Glyph 介面可能不安全。▲ Nothing Phone (2) 內置咗 10 種鈴聲，每種鈴聲都會有唔同嘅燈效。因為簽咗保密協議，今日只可以畀大家睇下外觀，有關處理器性能、相機質素等測試，就需要之後先再同大家分享。不過都簡單同大家講下，Nothing Phone (2) 嘅硬件規格，手機採用咗 6.55 吋 AMOLED 芒，解像度為 FHD+，支持 120Hz 屏幕刷新率，並支持屏下指紋辨識功能。同時，手機配備咗 Qualcomm Snapdragon 8+ Gen 1 處理器，我手上嘅版本，內置 12GB LPDDR5 RAM 以及 512GB UFS 3.1 ROM，電池容量為 4700mAh，並支持 33W 有線快充、15W 無線快充以及 5W 反向無線充電。至於相機方面，Nothing Phone (2) 具有 5000 萬像素廣角以及 5000 萬像素超廣角鏡頭，前置鏡頭則為 1600 萬像素。關於上市資訊方面，Nothing Phone (2) 會在 2023 年 7 月 21 日起，在1O1O、csl. 及連卡佛 Lane Crawford 公開發售，建議零售價為 $5499 (12+256GB) 及 $6299 (12+512GB)。香港用戶可於 7 月 12 日起進行預訂，並於 7 月 15 日起親臨 1O1O、csl. 及連卡佛 Lane Crawford 提取產品。
Source: ePrice.HK
