小米平板 6 開箱評測！三千蚊配 S870 U！外觀設計靚 + 造工好
小米平板 6 開箱 + 外觀
小米平板 6 性能
其他功能
001：自由視窗
002：裝置互連
003：會議工具箱
004：平行視窗
相較往年，今年我好似玩多咗平板電腦，Lenovo、Honor 定係 Nokia，我都有用一段時間。反而小米平板，一直我都想試下，但無乜機會試，好想知道，一個望落咁平嘅價錢，但內藏一個旗艦級嘅處理器，實際表現又係如何呢？呢篇文章中，會同大家做個開箱評測！Let's Go！小米平板 6 喺 7 月 11 日正式喺香港推出， 關於香港建議零售價幾多，上一篇文章我已經搶先同大家分享過 ，三千蚊有找，用上旗艦級數 8 系 U，望落去性價比相當高。喺外觀部分，小米平板 6 屏幕尺寸同小米平板 5 一樣，都係 11 吋，解像度為 2880 x 1800，像素密度則為 309ppi，屏幕顯示效果鮮明，而且飽和度較高，刷新率高達 144Hz，並且會根據顯示內容自動作出調整。然而，同上代相比，小米平板 6 顯得更加精緻細小，機背用上咗鋁金屬材質，屏幕四周嘅邊框相較上代更窄，啱啱好淨係夠握住平板電腦。相機部分係方形嘅設計，同小米 13 Pro 嘅相機設計風格相似，配置都比較基本，具有 1300 萬像素後置鏡頭，前置鏡頭為 800 萬像素，適合拍攝普通相片、簡單影片同埋進行視像通話。不過，相機並唔係平板電腦嘅主要用途，都好少會帶住咁大部平板電腦出去影相，所以呢度我就唔針對相機進行測試了。而手機頂部同埋底部都各有兩個喇叭，會根據橫向或者直向模式，去調整音效，而喺頂部兩個喇叭之間，會見到寫住 Dolby Vision · Atmos，底部則有 USB Type C 插槽。至於側邊，我哋可以見到其中一邊乜都無，而另一邊就有音量鍵同埋 Smart Pen 手寫筆嘅充電位置。而平板背部下方，則保留針狀嘅連接器，小米表示咁樣可以保證更好嘅鍵盤連接。講完小米平板 6 外觀上嘅介紹，接住落嚟就畀大家睇下開箱：▲ 小米平板 6 的包裝盒！▲ 側面寫住 Xiaomi Pad 6。▲ 我手上嘅係香檳金色，內置 8GB RAM 以及 256GB ROM。▲ 一打開包裝盒，會見到有小米平板 6 實機，面頭有個套套住，寫住一些平板嘅賣點，包括 144Hz 屏幕刷新率、Qualcomm Snapdragon 870 處理器、四喇叭、8840mAh 大電池、支持 33W 快速充電等等。▲ 包裝盒內有保養卡、快速指南、USB 線以及火牛。跟機火牛支持 33W 輸出。▲ 運行 MIUI 14 系統。▲ 具有 11 吋屏幕。▲ 打橫部機嚟睇，上方會有前置鏡頭。▲ 翻轉機背，會見到用上鋁金屬材質，望落去唔失禮。▲ 機背左上方會有方形設計嘅鏡頭，設計風格有少少似小米 13 Pro 咁。▲ 另外仲有針狀嘅連接器，用嚟連接鍵盤。▲ 側面會有音量鍵。▲ 頂部會有電源鍵，以及兩個喇叭。▲ 兩個喇叭之間會見到寫住 Dolby Vision·Atmos。▲ 底部則是 USB 插槽，同樣具有兩個喇叭。▲ 小米平板 6 支持 144Hz 屏幕刷新率。▲ 支持人臉解鎖功能。▲ 具有多個適用於平板電腦的功能。小米平板 6 採用了基於 Android 13 嘅 MIUI 14 作業系統，支持 Smart Pen 手寫筆同埋鍵盤，具有 IP53 防濺水功能，方便日常使用。平板電腦配備 Qualcomm Snapdragon 870G 處理器，內置 8GB RAM 以及 256GB ROM，並無支持 4G 或者 5G。另外，小米平板 6 內置 8840mAh 電池，並支持 33W 快速充電，正常或者重度使用下，大約可以使用 10 - 12 小時，滿足一天使用基本上無乜問題，而且充電速度快，用上 33W 充電器，由 0% 充電到 100%，大約只需 1 小時 45 分鐘，呢個都係一個唔錯嘅表現。而關於處理器的 CPU、GPU 表現，以及 ROM 的讀寫速度，版主會用安兔兔評測以及 AndroBench 5 應用程式，去將性能、讀寫速度等方面具體化，結果如下：▲ 根據安兔兔評測的結果顯示，小米平板 6 的總分為 781075 分，當中的 CPU 成績為 211627 分，GPU 成績為 214457 分。▲ AndroBench 5 連續讀取以及連續寫入速度，分別為 1688.95 MB/s 以及 778.31 MB/s。小米平板 6 的「設定」入面，係有個叫平板專區嘅地方，入面會見到有幾個同平板電腦有關嘅功能，當中包括「自由視窗」、「裝置互連」、「會議工具箱」以及「平行視窗」。「自由視窗」功能，意思係當你從底部向上拉，拉出全域應用程式列嘅時候，只要拖拽應用程式至中間區域，就可以打開浮窗，如果拖拽應用程式至兩側區域，就可以分割屏幕。呢個功能係一部平板電腦基本嘅功能，可以幫助你進行多工任務。當你同手機登入相同小米帳號，並開啟互連功能時，就會自動進行連線，令你可以喺平板電腦上，繼續使用手機喺度用緊嘅應用程式。喺全屏幕影片 / 語音通話時，透過呢個「會議工具箱」，可以快捷提供影片美肌、字幕轉錄等功能。當平板電腦喺橫向嘅情況下，應用程式會用平行視窗嘅方式顯示。如果關閉咗呢個功能，應用程式就會居中顯示。小米平板 6 在文章發表時，建議零售價為 $2999， 按這裡有詳細規格及最新賣價
Source: ePrice.HK
