超平價 8.4 吋平板電腦加推 128GB！行埋 4G 都只係 $900 有找！
酷比魔方 iPlay 50 mini 加推 128GB 版本
酷比魔方 iPlay 50 mini 硬件規格
$1000 有找嘅平板仲有呢部......
如果你唔打機，想買部平板電腦主要睇片用，未必需要買到好高配置，價錢平可能先係更重要嘅考慮因素。我哋睇返豐澤網店，會見到唔少賣到好平嘅大陸平板電腦選擇，甚至 $1000 都唔使嘅，都有得揀！最近有部本身開賣咗幾個月嘅大陸平板，加推咗 128GB 版本，但價錢依然保留幾百蚊價位，$900 都唔使，有大容量 + 支持 4G 上網，畀老人家或者小朋友做睇片機，或者都係一個可以考慮嘅選擇！說的是酷比魔方嘅 iPlay 50 mini，其實呢部平板電腦，64GB 版本原本已經賣咗一段時間，而啱啱呢排就喺香港加推咗 128GB 版本，建議零售價 $1299，豐澤最新賣價則為 $899；而睇埋深水埗嘅一間細舖，亦都賣緊差唔多價錢，開心價 $880。至於睇返 64GB 版本，現時最新賣價則 $779，相差大約 $100。呢個價錢買部平板電腦，算係入門門檻好低。不過 Specs 又點樣呢？規格方面，iPlay 50 mini 用上咗 8.4 吋屏幕，解像度為 1920 x 1200，配備 Unisoc T606 處理器，內置 4GB RAM，有 64GB / 128GB 兩個儲存容量版本，支持最高 512GB microSD 擴充，電池容量則為 4000mAh。相機部分，iPlay 50 mini 具有 500 萬像素嘅後置鏡頭，前置鏡頭同樣都係 500 萬像素。另外，iPlay 50 mini 運行 Android 13 作業系統，並且支持 4G LTE 雙卡雙待。講到大舖仲有賣嘅 $1000 有找平板電腦，除咗兩個儲存容量嘅 iPlay 50 mini 之外，另外仲有一部同樣出自酷比魔方手嘅 iPlay50，4GB + 64GB 版本建議零售價 $1199，最新大舖價則為 $999。爭個 mini，有乜唔同？iPlay50 用上咗 10.4 吋屏幕，芒大啲，解像度 2000 x 1200，配備 Unisoc Tiger T618 處理器，支持高達 2TB microSD 擴充，電池容量 6000mAh，電量更多。相機部分像素亦較高，後置鏡頭有 800 萬像素，而前置鏡頭則為 500 萬像素。
Source: ePrice.HK
