WhatsApp 測試新功能！更方便、更快將朋友加入 WhatsApp Group
毫無疑問，WhatsApp 係香港人最常用嘅通訊軟件，除咗會用嚟單對單傾計，相信大部份人 WhatsApp 入面，都會有多過一個嘅群組，可能係工作群組，可能係「我們這一家」嘅家庭群組，甚至大大小小嘅吹水群。不過，而家要加其他人入群，係相當唔方便，要左搵右搵先搵到個掣去邀請朋友，但而家有消息指，開發人員喺度測試緊一個更加方便嘅新方法，將你嘅朋友添加到群組入面！想知詳情，睇下文啦！以往如果你想要將新成員添加到 WhatsApp 群組入面嘅話，其實都幾麻煩，首先你要撳入去群組，然後撳入去上方嘅群組名稱，進入「群組資訊」頁面 (Android 嘅話點擊聊天入面嘅三點按鍵，入面會有「群組資訊」選項），然後點擊成員列表上方嘅「添加成員」，然後先可以將朋友加入去群組入面，如果你係第一次開群組，或者啱啱開始用 WhatsApp，你可能好難搵到呢一步。因此，WhatsApp 就通過 Android 入面嘅 2.23.16.10 Beta 版本，去測試一個簡單嘅解決方案。解決方法就係，只要你進入群組聊天畫面，如果本身群組設定係允許邀請朋友加入，你就會喺聊天畫面頂部直接見到「添加成員」嘅選項，只要撳一個掣，就可以將朋友加入群組入面，呢個小小嘅調整，可以節省用家寶貴時間，唔使喺入去「群組資訊」入面慢慢搵「添加成員」個掣，同時對於新用家嚟講，應該會更加 User Friendly！目前嘅資訊入面，就未提及呢個快速添加成員嘅選項，係咪淨係新群組先會有，定係正式推出之後，亦都會出現喺舊群組入面。但如果 WhatsApp 遲啲真係正式推出呢個改進，相信會更加方便群組嘅體驗。網友又點睇呢？來源： Android Police
Source: ePrice.HK
