姜濤演唱會丨林海峰自爆因姜濤事業創新高峰 承諾努力頒獎孝敬後輩：冇你冇我
MIRROR成員姜濤一連四場《KEUNG TO "WAVES" IN MY SIGHT SOLO CONCERT 2023》，昨晚在亞洲國際博覽館進行首場演出，ERROR成員梁業（肥仔）及林海峰擔任嘉賓。
【相關閱讀】：姜濤是非纏身連食嘢都冇心機 決收埋自己：藝人係冇私生活
【點擊睇姜濤演唱會靚相】：
姜濤經過一輪勁歌熱舞，搞到成頭大汗，他以毛巾為自己抹汗時，就介紹從來沒有合作過肥仔出場。身穿紅色西裝現身的肥仔，一手拎住姜濤抹汗的毛巾，為對方抹汗，更要求姜濤簽在毛巾上簽名，又嫌不夠汗味，再幫對方再次抹汗，他說：「索多兩啖汗先，呢個一定係我賣嘅。」肥仔自爆經常被問何時跟姜濤表演《特務肥姜2.0》，但對方應承過一定請他在個人演唱會做嘉賓，其後兩人合唱《特務肥姜2.0》。
現場播放姜濤剖白片段，片中的他在街頭揸住燈牌扮「姜糖」，感受一班姜糖的生活，當中他將燈牌高舉過頭，指這是最漫長的20分鐘，感覺好攰並謂：「姜濤好乞人憎！」而他亦跟「姜糖」道歉，皆因想到大家很迫等他而有點心噏，他說：「近年好驚同冇自信去面對大家，但唔應該懷疑大家喺唔喺度？應該同大家緊密多啲，由而家起我要將你哋變成我生命中真正一家人，辛苦你哋！」真情剖白片段中，姜濤更感動哽咽，當他唱完《好得太過份》後，亦眼濕濕讚歌迷好得太過份。
重演《叱咤》O嘴片段全場歡呼
最爆笑螢光幕播放姜濤於三年前在《叱咤樂壇流行榜頒獎典禮》獲頒「我最喜愛的男歌手」獎時的O嘴片段，引來「姜糖」歡呼聲，其後林海峰出場後指自己等了三年，因為疫情現場畫面有遺憾，更問在場「姜糖」說：「如果有你哋係咪更好，我等咗3年齊人係咪？今晚再頒過我準備一下。」然後林海峰重現當年的情況，還問姜糖能否做返個表情，搞到姜濤反問咩表情。林海峰指姜濤在這三年很辛苦，不過這個獎不止屬於他，而是「姜糖」，因為他們以作品說話。
林海峰又問在場「姜糖」：「你哋買幾多牙膏？食咗幾多炸雞？飲咗幾多汽水同啤酒？買幾份保險？做咗幾次body check？呢啲咪係用作品說話囉！你哋好勤力，樂壇係需要你哋。」林海峰續說「姜糖」不止為廣告界帶來新面貌，更為廣播道帶來新面貌，因為商台為他們換上鐵閘，更搞笑謂：「我喺商台30幾年，商台只係會換廁紙同主持人。你哋好犀利，前排30幾度，你哋個個變咗做盧覓雪，個個係熱暑人，但30幾度無人暈，所以姜濤你都唔可以暈。」隨即引來全場大笑。
林海峰自爆因姜濤事業創新高峰
林海峰提到銅鑼灣一年一度會變成姜濤灣，又問銅鑼灣渣弗人是誰，但並非浩南或大佬B，而是姜B，又自爆頒完獎畀姜濤後，令他人氣急升事業創新高峰，面書獲得不少留言感謝他愛錫姜濤，反而自己得獎沒有這麼多留言，他說：「最多嘅留言係樂壇已死、林狗得獎天理不容，所以我寧願頒獎都唔想得獎，我有冇獎唔緊要，我有冇獎頒畀姜濤先緊要，所以姜濤你唔係要努力成亞洲第一或者紅過羅湖，而係要努力成就我，所以個獎係屬於我，我而家將個獎畀你頒畀我，我係最喜歡歌手嘅最喜愛頒獎嘉賓。我答應大家會努力頒獎畀佢，我會孝敬後輩，冇你冇我。」
最後林海峰搞笑宣布自己會舉行演唱會，將會玩足三場，隨即螢光幕顯示將姜濤演唱會的海報改圖，海報上寫了當年對方在頒獎禮得獎O嘴講出「What！？」字樣，更呼籲幫他掃飛，約定大家一月一日（指頒獎禮）見姜濤。演唱會尾聲，姜濤以唱出《蒙著嘴說愛你》為個唱完滿結束。
【其他文章】：
姜濤演唱會｜逾三千粉絲齊集為姜濤應援 燈海聲勢浩蕩周邊產品檔排長龍
姜濤演唱會｜姜濤瘦身成功大跳勁舞 由舞蹈員抬起配煙火全場high爆
姜濤傳搭上御用髮型師後首開腔 黑底白字壓力疑瀕臨爆煲：我快要爆發了！
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
Source: 星島頭條
