預告：荃灣豐澤特賣場 5 件精選必搶產品
001：小米 12 (12GB+256GB) 灰色
002：小米 12X (8GB+256GB) 紫色
003：Apple MacBook Air (M1) 13 吋 256GB
004：ASUS ExpertBook B5 OLED
005：三星 Galaxy Book 2
我哋之前就同大家預告過，聽日（8 月 4 日），荃灣豐澤特賣場又嚟喇！當然，我哋一如既往，會聽日一早去「朝聖」，睇下有乜抵玩倉底貨，雖然今次豐澤 Facebook 都無特別預告有乜精選陳列產品，但我哋已經幫大家率先了解咗，並精選咗 5 件必搶陳列產品出嚟，其中包括 Apple MacBook Air (M1)！想知詳情，睇下文啦！小米 12 係屬於舊代產品，今年小米佢哋已經推出到小米 13 系列，影相仲好正好靚，但正正因為係舊代，所以要清貨都有着數！呢部小米 12 剛推出嘅時候，建議零售價 $5699，但而家豐澤陳列清貨，$2736 就買到，雖然陳列未必有保養，但當係後備機，當買二手機粗用，都未嘗唔係唔能夠考慮。而規格方面，小米 12 用上咗 6.28 吋屏幕，解像度為 2400 x 1080，配備 Qualcomm Snapdragon 8 Gen 1 處理器，內置 12GB RAM 以及 256GB ROM，電池容量為 4500mAh，支持 67W 有線快充以及 50W 無線快充，並具有 50MP + 13MP + 5MP 三鏡頭。小米 12X 如果係全新嘅話，建議零售價為 $4399，根據豐澤網店上顯示，有分店仲有全新貨，特價為 $3799；但荃灣豐澤特賣場，就當然唔係賣全新貨，陳列優惠價 $2112，比全新平超過 $1600。手機採用咗 6.28 吋屏幕，解像度 2400 x 1080，配備 Qualcomm Snapdragon 870 處理器，內置 8GB RAM 以及 256GB ROM，電池容量為 4500mAh，支持 67W 有線快充，相機則有 50MP + 13MP + 5MP 三鏡頭組合。除咗以上 2 部手機，豐澤仲精選咗 3 件開倉電腦畀我，其中 13 吋 Apple MacBook Air (M1) 256GB 版本，陳列優惠價為 $5616。 記得之前 Amazon Prime Day，我哋都有分享過嗰陣特價 $749.99 美金，計返港紙 $6000 有找，但加埋集運運費就過六千 ，而家 Amazon 都仲有貨，你可以去返之前我哋篇文了解返。至於豐澤特賣場 $5616，平過 Amazon 唔使等即買即用，但未必有保養 (唔排除可能有機會開機未夠一年仲有保，但都唔好抱有咁多幻想)。ASUS ExpertBook B5 OLED (2021) 陳列清貨價 $4498，相比建議零售價 $7699 平咗 $3200，除咗具有 13.3 吋 OLED 屏幕，而且配備 Intel Core i5-1135G7 處理器，而非現時最新一代嘅處理器，內置 6GB RAM 以及 1TB ROM，續航時間可達 12 小時。但主要賣點都係 sell 超薄。今次荃灣豐澤特賣場，三星 Galaxy Book 2 的陳列價錢為 $3890，除咗具有 15.6 吋 FHD 大屏幕，而今次清貨版本係配備 Intel Core i5-1235U 處理器，內置 16GB RAM 以及 512GB SSD，具有 54Wh 電池，而且連接端口都好齊全，有 2 個 USB 3.2 插槽、2個 Type C 插槽、1 個 HDMI 插槽、1 個 microSD 插槽以及 3.5mm 耳機孔，配合埋三星平板，可以將平板變成第二個屏幕。
Source: ePrice.HK
