周吉佩經歷3次低潮企窗邊「想就咁算」 大爆太太口不對心舉動
《中年好聲音》總冠軍周吉佩（吉吉）日前接受無綫娛樂新聞台主持許文軒（Edmond）《Star Talk》專訪，暢談獲奬後的感受及展望、加入演藝圈後的高低起跌、走出情緒低谷的經過，並按 Edmond 要求細數《中年好聲音》三位值得學習對象——吳大強（Bill哥哥）、龍婷及支嚳儀（Venus）。
【相關閱讀】：中年好聲音｜羅啟豪自爆最新去向！罕談猛料母親與方逸華關係
【點擊睇周吉佩回顧《中年好聲音》心路歷程】：
談到年屆 71歲的Bill哥哥，吉吉最佩服對方精力依然旺盛：「佢好有風采好瀟灑，有時我哋綵排到凌晨一、兩點，我行埋去問佢攰唔攰，佢次次都話：『攰咩？』佢係真犀利，有時我哋喺度休息，佢就去咗電視城四圍行，嗰次肥媽演唱會，佢又係四圍行。」至於龍婷，吉吉最欣賞對方有自信、有想法及了解自己；而Venus令吉吉最欣賞的地方是其正向思想：「佢面對唔好嘅評語都可以好從容，佢畀人話對眼生得好埋，仲特登影張相擺出嚟笑番自己，我好佩服佢 EQ，佢成日話：『我哋做生意經歷唔少風浪，呢啲冇乜嘢。』」之後吉吉再談及認識了十多年、大家一起成長的好友曹敏寶，吉吉指二人從開始到現在都是打打鬧鬧地相處，並笑指除了在《中年》獲獎一刻，寶寶於吉吉當年的婚禮也有哭，有時甚至比吉吉太太哭得還多。
懂得欣賞身邊人的吉吉，一路走來不易，並經歷了三起三跌。21 歲那年，吉吉因在電視台舉行的歌唱比賽中獲得亞軍投身演藝圈，可惜因未做好當藝人的心理準備，吉吉出了一隻碟後便和公司結束合作關係，吉吉形容當時是「人生第一次夢醒」。之後吉吉與之前夾開的音樂發燒友組成樂隊sp'ACE，於2015年獲唱片公司賞識簽約，並於2019年在旺角麥花臣球場開演唱會；可惜sp'ACE 最終因意見不合解散，令吉吉再度陷入低潮，心身亦先後出現問題：「有日我企喺窗邊，望望吓覺得自己人生咩都失敗，做乜都唔順，我問自己仲堅持嚟做乜，嗰吓有少少想就咁算，又有一日我臨瞓前突然（覺得）好似有個人用手壓住我個心咁，唔係好唞到氣。」
幸好吉吉有及時意識到問題，並靠家人的支持及陪伴走出陰霾。第三個低潮，是吉吉自獲得《中年》總冠軍後，一直備受爆冷傳聞困擾，吉吉雖曾因而影響自信甚至失眠，但卻沒有被擊倒，見慣風浪的他立定決心先把現在做好：「以前初出道好天真，覺得25歲要有自己嘅演唱會，當年我得21歲，又諗住幾時要買到樓。依家我冇諗咁遠，都唔會諗仲有冇人鍾意自己，而係先做好表演，腳踏實地先。」吉吉更強調「吉士粉」是鞭策他做得更好的最大動力，並感謝粉絲沿路上的踴躍支持。另外吉吉還點名感謝了黎瑞恩：「佢成日教我哋好多嘢，教我哋做人要謙虛同埋要準時。佢又畀機會sp'ACE 喺紅館唱咗一隻我哋自己嘅歌，我諗我人生再冇可能有呢啲機會。」
談到太太，吉吉笑言比賽初期太太黃彥欣不但沒有親臨錄影廠支持，甚至對於吉吉出門參賽也是零反應。直到吉吉得到「復活」機會，阿欣才由冷淡轉為支持，不但對吉吉噓寒問暖，更落手落腳為吉吉揀選出賽歌。主持Edmond笑問吉吉太太是否「口不對心」類型、明明支持卻扮作不支持時，吉吉竟反應很大斷言：「你唔使幫佢講好說話喇，佢係直到覺得原來仲有人欣賞我，態度先180度轉變。」談到決賽當晚的快歌環節，吉吉透露原本並非選唱《跳舞街》：「本身我係好理所當然諗咗要彈電結他，第一隻諗嘅係《紅色跑車》，後來唔揀係我問自己點解個個最後一round都有突破而我要咁safe？我覺得我要試一啲完全未試過嘅嘢，先對自己有完整交代，所以我同製作組講要搏盡無悔，唔得我都要試。」
【其他文章】：
56歲溫碧霞內地商演大露背疑真空上陣露半球 側身照瘋傳網民熱討：明星必須裸露？
中年好聲音｜羅啟豪自爆最新去向！罕談猛料母親與方逸華關係
45歲蔣怡現排骨胸瘦到隻手皮包骨勁驚嚇 網民心疼叫食多啲擔心變人乾
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
Source: 星島頭條
