幾百蚊超平玩 50MP 雙鏡頭！仲有 8GB+128GB 大容量！Ulefone Note 16 Pro 開箱評測！
Ulefone Note 16 Pro 開箱
Ulefone Note 16 Pro 性能
Ulefone Note 16 Pro 相機
一般拍攝 50MP 拍攝 微距拍攝
小結
有一個品牌，我哋不時會介紹，未必人人都中意，但一般好多時講起佢，都會諗起佢哋嘅三防機，而且價錢好平，呢個品牌就係 Ulefone。不過，近年佢哋感覺都開始轉玩多咗一啲正常、非三防嘅入門 Cheap 機，好似我最近喺度測試嘅 Note 16 Pro，幾百蚊貨仔已經有 8GB+128GB 的手機，而且仲有 5000 萬像素相機，到底實際表現如何呢？呢篇文章就等我同大家上手開箱評測一下啦！開箱之前先講外觀，我手上嘅 Ulefone Note 16 Pro 係藍色機身嘅，手機採用咗 6.52 吋 IPS 屏幕，驟眼睇設計就同一般嘅智能手機差唔多，不過下巴就闊咗少少，呢樣我就唔係好 Like，但又咁講，幾百蚊貨仔，都預咗唔會做到好靚畀你，所以呢點係無乜太大要求。邊框有少少似 iPhone 14 Pro Max 嗰種咁，但傾向有少少膠膠哋，不過其實呢種邊框，唔理係 iPhone 14 Pro Max 定係 Ulefone Note 16 Pro，都係容易會印哂啲指紋落去，一係戴返個套安全啲，一係就抹得勤力啲。而機背設計則比較平滑，類似磨砂嘅感覺，呢樣個人覺得以幾百蚊手機嚟講，算係幾唔話得，樣子算係幾討好，唔知你又中唔中意呢？▲ Ulefone Note 16 Pro 包裝盒。▲ 係香港行貨嚟，由鵬勃 (Pengbo) 代理。▲ 其中一邊寫着手機的規格賣點，例如用八核心處理器 (入門機當然唔講用乜U)、8GB RAM + 128GB ROM (以幾百蚊貨仔有呢個儲存容量係吸引)、水滴芒、50MP 雙鏡頭、4400mAh 大電等等，並且支持 Android 13 作業系統。▲ 一打開包裝盒，映入眼簾嘅係 Ulefone Note 16 Pro 嘅外觀，不過就畀個膠袋套住。▲ 手機上貼住又係頭先講嗰堆賣點。▲ 內有保用證、火牛、充電線以及一個透明膠套。▲ 充電火牛支持 10W 快速充電。▲ 一開機，以為係畀老人用，「字大」到呢～即刻去「Vision Settings」(視覺設定之類吧，我後來改回繁體中文 (香港)了)，調整返唔好咁「字大」。▲ 水滴芒設計，現今入門機嚟講好普遍嘅設計。▲ 下巴比較明顯地粗。▲ 機背光面平滑，唔易沾指紋，呢個我 Like！▲ 有雙鏡頭，幾百蚊貨仔有 5000 萬像素，算係咁！▲ 機背下方有 Ulefone 字樣。▲ 音量鍵明顯有紋理，方便更加容易摸到。▲ 左側係 SIM 卡槽。▲ 底部則有 3.5mm 耳機孔同埋 Type C 插槽。▲ 側邊比較容易痴指紋。▲ 不過，呢個設計如果同你講 $1000 都唔使，我覺得一定會收貨！規格方面，Ulefone Note 16 Pro 配備咗 Unisoc T606 處理器，內置 8GB RAM 以及 128GB ROM，電池容量為 4400mAh，沒有支持快充技術。我 曾經有用過用上呢粒處理器嘅 Nokia T10 ，不過佢就係一部平板嚟，但用落去覺得相當順暢，唔似係一粒入門 U，當然可能都有 Nokia 對軟件上嘅處理，佢調校得好，所以令到使用感更佳，但我一直用呢部 Note 16 Pro，都無覺得明顯嘅窒機 (當然無人叫你拎部咁嘅電話去打機啦)，一般使用我覺得速度反應可以接受。具體性能係點，我就一如既往用安兔兔評測、AndroBench 5，同大家將 CPU、GPU 性能，以及 ROM 讀寫速度具體化 show 畀大家睇！▲ 安兔兔總分 222723 分，呢個成績比起之前幫 Nokia T10 跑過嘅 171833 分還要高，但其實呢個成績只係參考，因為有一個最大問題是，呢個安兔兔跑分居然 run 唔到 GPU 嘅測試，所以顯示成績為 0。▲ AndroBench 5 顯示了手機的 ROM 讀寫速度，屬於 UFS 2.2 的水平。Ulefone Note 16 Pro 具有雙鏡頭，但比較令我感到意外嘅，係佢居然有 5000 萬像素，雖然像素高唔代表乜，從來高像素同高質素不成正比，但幾百蚊玩到高像素鏡頭，算係一個 Gimmick。除咗 5000 萬像素主鏡頭之外，另外還有一個 200 萬像素嘅微距鏡頭。相機唔會係咩賣點，我就純粹畀大家睇下幾張，用 Ulefone Note 16 Pro 影出嚟嘅相機成像，畀大家自行評價，用嚟普通隨手影嘅「相機」，合唔合格。簡單嚟講，我會認為幾百蚊貨仔，你唔應該對 Ulefone Note 16 Pro 嘅相機有期望，環境夠光嘅時候，縮圖無限好，但一到唔夠光或者夜晚時，就縮圖都夠你唔到。另外，相機快門會偏慢一點，尤其是用「超清拍攝」(5000 萬像素) 模式時，對焦準確度以及快門速度，有時會有啲奇奇怪怪，同埋會頗慢。唔係指按完快門 load 相嘅速度，而係指按完快門嘅反應速度。長話短說，Ulefone Note 16 Pro 香港叫價 $899，一部幾百蚊貨仔的手機，我唔會有太大想法，都係一部普普通通後備機，唔會諗住用嚟打機，唔會諗住用嚟影靚相，但勝在外觀又算係靚仔，又有大芒，而且有 8GB RAM + 128GB ROM，又有 4400mAh 大電，算係都有啲 Gimmick。唔知大家又點睇呢部手機呢？
Source: ePrice.HK
